कास्की, ५ असार । पोखरा महानगरपालिकाले आगामी आर्थिक वर्ष २०८३/८४ का लागि सात अर्ब १५ करोड २५ लाख रूपैयाँ बजेट ल्याएको छ । महानगरका उपप्रमुख मञ्जुदेवी गुरुङले आज पोखरा सभागृहमा बसेको १९औँ नगरसभामा बजेट कार्यक्रम प्रस्तुत गर्नुभएको हो । चालु वर्षमा आठ अर्ब ३५ करोड १२ लाख रूपैयाँ बजेट ल्याएको महानगरले आगामी वर्षका लागि बजेटको आकार घटाएको हो । आगामी वर्षको बजेट चालुको भन्दा एक अर्ब १९ करोड ८७ लाख रूपैयाँले न्यून हो ।
बजेटका स्रोतहरूमा सङ्घीय सरकार सशर्त अनुदानबाट दुई अर्ब ६१ करोड ९१ लाख रूपैयाँ, विशेष अनुदान पाँच करोड ५० लाख रूपैयाँ, समपूरक अनुदान एक करोड ८२ लाख रूपैयाँ र सङ्घीय सरकार समानीकरण अनुदान ४९ करोड ३७ लाख रूपैयाँ रहेको छ । त्यसैगरी, गण्डकी प्रदेश सरकार समपूरक अनुदानतर्फ ६० लाख रूपैयाँ, विशेष अनुदान र ४० लाख रूपैयाँ र समानीकरण अनुदान आठ करोड १५ लाख ३६ हजार रूपैयाँ अनुमान गरिएको उपप्रमुख गुरुङले जानकारी दिनुभयो ।
राजस्व बाँडफाँटबापत सङ्घीय सरकारबाट ३४ करोड ३४ लाख ७३ हजार रूपैयाँ, गण्डकी प्रदेश सरकारबाट चार करोड नौ लाख ८६ हजार रूपैयाँ, राजस्व बाँडफाँट स्थानीय सरकारतर्फ एक अर्ब ३१ लाख १४ हजार रूपैयाँ र आन्तरिक स्रोततर्फ दुई अर्ब ४८ करोड ७३ लाख ९१ हजार रूपैयाँ गरी कुल आन्तरिक आय तीन अर्ब ८७ करोड ४९ लाख ६४ हजार रूपैयाँ अनुमान गरिएको छ ।
महागनरको वित्तीय स्थायित्व कायम गर्दै राजस्व दायरा विस्तार, पर्यटकीय राजधानी पोखराको आर्थिक गतिविधि विस्तार गरी रोजगारी अभिवृद्धि र वातावरणमैत्री र दिगो सहरी विकास प्रवर्द्धन गर्नु बजेटका उद्देश्य रहेको उपप्रमुख गुरुङले बताउनुभयो ।
“चालु खर्चलाई वाञ्छित सीमाभित्र राख्ने, राजस्व सुधार योजना कार्यान्वयन, निजी क्षेत्रको लगानी आकर्षित, पोखरालाई अन्तर्राष्ट्रिय पर्यटन गन्तव्यका रूपमा आकर्षण गर्ने र आधुनिक फोहरमैला प्रशोधन केन्द्र निर्माण बजेटका प्राथमिकता क्षेत्रहरू हुन्”, उपप्रमुख गुरुङले भन्नुभयो ।
महानगरले आगामी वर्षमा फिर्केखोला कोरिडोर पोखरा बसपार्क लगायतका महानगर क्षेत्रभित्र रहेका सार्वजनिक जग्गा संरक्षण तथा अतिक्रमित जग्गा संरक्षण र व्यवस्थापनका लागि १० करोड रूपैयाँ बजेट विनियोजन गरेको छ ।
महानगरले पूर्वाधार तथा सहरी विकासतर्फ ६१ सडक आयोजना पूरा गर्नका लागि ५५ करोड ५० लाख ६३ हजार रूपैयाँ विनियोजन गरेको छ । पोखरा सभागृह पुनर्निर्माणका लागि पाँच करोड रूपैयाँ छुट्याइएको छ । शिशुवा अस्पतालमा विशेषज्ञ सेवा विस्तारका लागि एक करोड २० लाख रूपैयाँ र गण्डकी बहुप्राविधिक शिक्षालयका लागि दुई करोड ६० लाख रूपैयाँ विनियोजन गरिएको छ ।
महानगरको फोहरमैला ढुवानी तथा व्यवस्थापनका लागि १५ करोड रूपैयाँ र प्रभावित क्षेत्रका लागि थप पाँच करोड रूपैयाँ बजेट विनियोजन गरिएको उपप्रमुख गुरुङले बताउनुभयो । निर्माणाधीन तालचोक बेगनास सडकको बाँकी काम सम्पन्न गर्नका लागि १५ करोड २५ लाख रूपैयाँ विनियोजन गरिएको छ ।
यसैगरी, विपद् जोखिम न्यूनीकरण र पुनःस्थापनाका लागि तीन करोड २४ लाख रूपैयाँ, सामुदायिक विद्यालयमा विद्यालय नर्स कार्यक्रमका लागि तीन करोड रूपैयाँ विनियोजन गरेको छ । महानगरले कृषि क्षेत्रको उत्पादन तथा उत्पादकत्व वृद्धि गरी कृषिलाई आधुनिक व्यावसायिक र प्रतिस्पर्धी बनाउन तीन करोड ६८ लाख रूपैयाँ र उद्यम विकास, रोजगार सिर्जना तथा नवप्रवर्तनका लागि एक करोड २५ लाख रूपैयाँ छुट्याइएको छ ।
बजेट कार्यक्रममा पर्यटन प्रवर्द्धनका लागि ६० लाख रूपैयाँ, तथा खेल पर्यटनका लागि र ६६ लाख रूपैयाँ विनियोजन गरिएको छ । महानगरले चालु वर्षमा विनियोजित बजेटमध्येमा जेठ मसान्तसम्म जम्मा ४० प्रतिशत खर्च भएको जनाएको छ ।
चालुतर्फ तीन अर्ब ५१ करोड ३२ लाख ८९ हजार रूपैयाँ र पुँजीगततर्फ चार अर्ब ८३ करोड ७९ लाख ११ हजार रूपैयाँ अनुमान गरिएकामा चालुतर्फ दुई अर्ब १६ करोड ९७ लाख ५५ हजार रूपैयाँ र पुँजीगततर्फ एक अर्ब १७ करोड आठ लाख ६० हजार रूपैयाँमात्र खर्च भएको उपप्रमुख गुरुङले बताउनुभयो ।
