काठमाडौँ, ४ भदौ । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले साहित्य, कला र संस्कृति जीवनको अत्यन्तै संवेदनशील र प्रभावशाली पक्ष भएको बताउनुभएको छ ।
बाबा बस्नेतका तीन कृति रङ्गीन घरहरू (कथासङ्ग्रह), ढुङ्गामा आकार (कवितासङ्ग्रह) र आवाज (श्रव्य नाटकसङ्ग्रह) को लोकार्पण समारोहमा बोल्दै अध्यक्ष दाहालले आफू राजनीतिमा सक्रिय हुनुअघि साहित्यप्रति गहिरो लगाव रहेको उल्लेख गर्नुभयो ।
उहाँले भन्नुभयो, ‘साहित्य, कला व्यक्तिको जीवन र सामाजिक जीवनको असाध्यै संवेदनशील, असाध्यै प्रभावशाली क्षेत्र हो । राजनीतिमा लाग्नुअघि मेरो पहिलो प्राथमिकता साहित्य नै थियो ।’
आफूलाई धेरैले भावुक र तुरुन्तै मन पग्लिने स्वभावको व्यक्ति भनेर चिनाउने गरेको भन्दै उहाँले राजनीतिक यात्राको सुरुवात २०–२२ वर्षको उमेरमा गरे पनि त्यसअघि उपन्यास, कथा र कविता पढ्नमा अत्यधिक समय बिताएको स्मरण गर्नुभयो ।
‘कलासाहित्यतर्फ मेरो गहिरो रुचि थियो, तर राजनीतिमा सक्रिय भएपछि त्यो क्षेत्रमा समय दिन सकिएन । अहिले पनि राजनीतिक व्यस्तता यति धेरै छ कि साहित्यमा समय दिन नपाएकोमा दुःख लाग्छ,’ प्रचण्डले भन्नुभयो ।
साथै उहाँले देशको वर्तमान राजनीतिक परिस्थिति अस्थिर र संवेदनशील भएको उल्लेख गर्दै आफूले त्यसको ठुलो जिम्मेवारी बोकिरहेको धारणा व्यक्त गर्नुभयो ।
उहाँले भन्नुभयो, ‘सरकारमा त छैन, तर देशको राजनीतिको खम्बा मैले छोडिदिए सबै भत्किने जस्तो लाग्छ । गर्ल्याम गुर्लुङ ढल्ने पो हो कि जस्तो लाग्छ । पूरै जिम्मा मेरो काँधमा जस्तो लागिरहेको छ ।’
उहाँले हालको राजनीति संकटपूर्ण मोडमा रहेको संकेत गर्दै आफूमाथि परेको दबाब बारे खुलस्त गर्नुभएको थियो ।
