काठमाडौं । संघीय संसद्का दुवै सदन—प्रतिनिधिसभा र राष्ट्रियसभाको बैठक आज बस्दैछ। बैठकको सम्भावित कार्यसूचीअनुसार आगामी आर्थिक वर्ष २०८२/८३ का लागि विनियोजन विधेयकका सिद्धान्त र प्राथमिकतामाथि (कर प्रस्ताव बाहेक) छलफल सुरु हुने कार्यक्रम रहेको छ।
प्रतिनिधिसभाको बैठक बिहान ११:०० बजेका लागि बोलाइएको छ भने राष्ट्रियसभाको बैठक अपराह्न १:१५ बजेका लागि निर्धारण गरिएको छ। संसद् सचिवालयका महासचिव पद्यमप्रसाद पाण्डेका अनुसार दुवै सदनमा समान कार्यसूचीअनुसार छलफल सुरु हुनेछ।
उपप्रधानमन्त्री तथा अर्थमन्त्री विष्णुप्रसाद पौडेलले वैशाख २८ गते प्रतिनिधिसभामा विनियोजन विधेयकका सिद्धान्त र प्राथमिकता प्रस्तुत गरेका थिए। सोही दिन संसद्ले सरकारको नीति तथा कार्यक्रम बहुमतले पारित गरेको थियो।
अब संसद्मा सुरु हुने विस्तृत छलफलले आगामी बजेट निर्माणको आधार तय गर्नेछ। खर्चका क्षेत्र, प्राथमिकताप्राप्त योजना, समावेशी विकास, पूर्वाधार विस्तार र सामाजिक सुरक्षाका कार्यक्रमलाई केन्द्रमा राखेर बजेट निर्माण गरिने संकेत सरकारले दिइसकेको छ।
संसद्मा हुने छलफलपछि विनियोजन विधेयकको प्रारूपलाई अझ स्पष्ट, सन्तुलित र व्यवस्थित बनाइने अर्थ मन्त्रालय स्रोतको भनाइ छ। यस बहसले सरकारको नीति र बजेटको दिशा निर्धारणमा महत्त्वपूर्ण योगदान पुर्याउने अपेक्षा गरिएको छ।
