काठमाडौँ, १४ जेठ । वैदेशिक रोजगारीका नाममा ९७ लाख ५८ हजार रूपैयाँ ठगी गरेको अभियोगमा छ जना पक्राउ परेका छन् ।
केन्द्रीय प्रहरी समाचारकक्षका अनुसार उदयपुरको रौतामाई गाउँपालिका–४ का राम बहादुर आलेमगर, लहान नगरपालिका–६ का आशिष कार्की, टोखा नगरपालिका–४ का लोक बहादुर श्रेष्ठ, सोही नगरपालिका–३ की तुलसा पुन मगर, तानसेन नगरपालिका–७ का कृष्णप्रसाद पोखरेल र चन्द्रागिरि नगरपालिका–११का प्रवीण श्रेष्ठलाई हालै पक्राउ गरिएको हो ।
अभियुक्तमध्ये राम बहादुरले क्यानडा पठाउने भन्दै चार जनाबाट ३९ लाख ५८ हजार रूपैयाँ, आशिषले न्युजिल्यान्डको प्रलोभनमा पारेर तीन जनाबाट १३ लाख रूपैयाँ, लोक बहादुरले बेलायतमा राम्रो कमाइ हुन्छ भन्दै एक जनाबाट १९ लाख रूपैयाँ, तुलसाले अमेरिका पठाउने भनेर एक जना पीडितबाट १० लाख रूपैयाँ, कृष्णप्रसादले दुबईको लोभ दोखाएर एक जनाबाट १० लाख रूपैयाँ र प्रवीणले सर्बिया पठाइदिन्छु भन्दै एक जनाबाट छ लाख रूपैयाँ ठगेका थिए ।
