काठमाडौँ, १८ वैशाख । अभिनेता विपिन कार्कीले आफ्नो आगामी फिल्म ‘काजी’ प्रेमिल जोडीको कथा रहेको बताउनुभएको छ । आगामी जेठ ८ गतेदेखि प्रदर्शनमा आउने फिल्म ‘काजी’ को पहिलो गीत ‘वारि वर पारि पिपलु’ सार्वजनिक गर्न आयोजित कार्यक्रममा अभिनेता कार्कीले आफ्नो पात्र परम्परागत काजी जस्तो नरहेको बताउनुभयो ।
उहाँले भन्नुभयो, “हामीले काजी भन्ने बितिकै मुखिया, गाउँको ठुलाबडा भन्ने बुझ्छौँ, तर मैले निर्वाह गरेको पात्र मायालु काजी हो । काजी परिवारको भएकाले मेरो पात्रलाई काजी भनिएको हो, तर यो प्रेममा काजीपन देखाउने पात्र हो । यो प्रेमिल जोडीको कथा हो ।”
अभिनेता कार्कीले ‘काजी’ मा देखाइएको प्रेम कथा ‘रोमियो जुलियट’, ‘मुना मदन’ जस्तै आगामी धेरै वर्षसम्म सम्झिने प्रेम कथानक बन्ने विश्वास व्यक्त गर्नुभयो । उहाँले फिल्मको कथावस्तु, निर्देशकीय पक्ष, छायाङ्कन पक्ष, आर्ट डिपार्टको प्रशंसा गर्नुभयो ।
अभिनेत्री केकी अधिकारी र गरिमा शर्माले फिल्मको कथाको प्रशंसा गर्नुभयो । लक्ष्मण रिजालको निर्देशनमा निर्माण भएको फिल्म ‘काजी’ मा ग्रामिण पृष्ठभूमिमा तयार गरिएको प्रेमकथा देखाएइको छ ।
“यो अलिक समय अगाडिकको ग्रामिण भेगमा बस्ने एउटा जोडीको प्रेम कथा हो । यसले हामीलाई हाम्रो बाल्यकाल वा त्यो भन्दा अगाडिको समयको निःस्वार्थ प्रेमसँग परिचित गराउँछ । यो फिल्मले प्रेमको नयाँ कथ्यशैलीको सुरुवात गर्नेछ भन्ने लागेको छ,” निर्देशक रिजालले भन्नुभयो ।
रिजाल एन्ड रिजाल प्रोडक्सनको प्रस्तुति रहेको फिल्मका प्रस्तुतकर्ता रामप्रसाद रिजाल हुनुहुन्छ ।
फिल्ममा विपिन कार्की, केकी अधिकारी, गरिमा शर्मा, हेमन्त बुढाथोकी, प्रकाश घिमिरे, विशाल पहारी, हिउँवाला गौतम, अनुराग कुँवर, सन्दीप बाबु लोहानी, विनोद न्यौपाने, रश्मि भट्ट, प्रीतिका शर्मा, प्रशंसा सुबेदी, नवराज गिरी तथा बाल कलाकार दीक्षित अर्याल, आरव बराल र सुपला सापकोटालगायतको अभिनय रहेको छ ।
प्रदीप भारद्वाजको कथा/पटकथा रहेको फिल्मको छायाङ्कन चिन्तन राजभण्डारीले गर्नुभएको हो । फिल्ममा कालीप्रसाद बास्कोटाको सङ्गीत, ओजस्वी ओझाको प्रोडक्सन डिजाइन, श्याम कुँवरको रङ संयोजन, सुजिल कर्माचार्यको पृष्ठभूमि सङ्गीत, कविराज गहतराजको नृत्य निर्देशन रहेको छ ।
