काठमाडौँ । हाल नेपालमा पश्चिमी वायु, स्थानीय वायु तथा बंगालको खाडी र अरब सागरबाट आएको जलवाष्पयुक्त हावाको संयुक्त प्रभाव देखिएको मौसम पूर्वानुमान महाशाखाले जनाएको छ।
महाशाखाका अनुसार बंगालको खाडीको उत्तर–पश्चिम तथा दक्षिण–पश्चिम क्षेत्रमा, साथै भारतको केरला क्षेत्र, माल्दिभ्स र श्रीलङ्कामा मनसुन प्रवेश गरिसकेको छ भने खाडीबाट जमिनतर्फ मनसुन अगाडि बढ्ने क्रममा छ।
सोमबार दिउँसो कोशी, मधेस र बागमती प्रदेश लगायत देशका पहाडी भू–भागमा आंशिकदेखि सामान्य बदलीको अवस्था रहनेछ। बाँकी क्षेत्रमा मौसम मुख्यतः सफा रहने अपेक्षा गरिएको छ।
कोशी, मधेस, बागमती लगायत पहाडी क्षेत्रका थोरै स्थानहरूमा र अन्य प्रदेशका एक–दुई स्थानमा मेघगर्जन र चट्याङसहित हल्कादेखि मध्यम वर्षा हुने सम्भावना रहेको महाशाखाले जनाएको छ।
त्यसैगरी, देशका उच्च पहाडी तथा हिमाली भेगका एक–दुई स्थानमा हल्का वर्षासँगै हिमपातको सम्भावना पनि छ।
महाशाखाले वर्षा र खराब मौसमका कारण दैनिक जनजीवन, कृषि, स्वास्थ्य, सडक तथा हवाई यातायातमा असर पर्न सक्ने भएकाले आवश्यक सतर्कता अपनाउन सर्वसाधारणलाई अनुरोध गरेको छ।
