काठमाडौँ, १२ फागुन । राष्ट्रिय स्वतन्त्र पार्टी (रास्वपा)की सांसद डा.तोसिमा कार्कीले स्वास्थ्यमन्त्री प्रदीप पौडेललाई मार्ग प्रशस्त गर्न माग गर्नुभएको छ ।
सोमबार प्रतिनिधिसभा बैठकको शून्य समयमा बोल्नुहुँदै उहाँले स्वास्थ्य बिमाको सीमालाई पाँच लाखको पुर्याउँछु भनेर मन्त्रीले पौडेलले सपना बाँडे पनि अहिले बिमा नै बन्द हुने अवस्थामा पुगेको भन्दै तथ्यांकगत अध्ययन पुग्दैन भने मार्ग प्रशस्त गर्न सुझाव दिनुभयो ।
उहाँले भन्नुभयो,‘स्वास्थ्य बिमाको सीमालाई पाँच लाखको पुर्याउँछु भन्ने महत्वकांक्षी सपना बाँड्नुहुने स्वास्थ्यमन्त्रीज्यूबाट नै अब यो भुक्तानी गर्न सकिएन, बजेट पुगेन स्वास्थ्य बिमा बन्द हुन लाग्यो भनेर लाचार अभिव्यक्ति सुन्दा दुःख लागेको छ । स्वास्थ्य बिमा ल्यायौँ भनेर जस लिन खोज्ने अनि यसलाई अलपत्र पारेर वर्षौँदेखि जम्मा २६ देखि २८ प्रतिशत मात्र पहुँच राखेर कार्यक्रमलाई धरासयी बनाएपछि हतोत्साहित हुने बानी राम्रो भएन । यदि उपयुक्त सल्लाह लिन सकिँदैन, अध्ययन, तथ्यांकगत अध्ययन पुग्दैन भने मार्ग प्रशस्त गरिदिनुहोला । हामी सुझाव दिन तयार छौँ ।’
